18米巨无霸应该再多啲

　　广州个BRT从一开始俾人闹，到今时今日越来越方便沿线坐公交车出行嘅街坊，中间都做咗唔少功夫同尝试。听讲，BRT专用嘅超级巨无霸公交车呢两日开始上路载客，BRT又多咗样解决运力不足嘅架参，的确系好嘢。

　　有体验咗BRT巨无霸公交车嘅市民就话，部车又大又阔，最多坐成180个人都无问题，而且车内空调够劲，温度低，坐得好舒适。之前有人担心部车鬼咁大，转弯成问题，事实上都证明转得好轻松。可惜，咁好啲车，成条BRT得6部，家下仲要系试运行，唔参与高峰期运输添。

　　BRT上边公交车嘅速度快系够快，但我有个朋友就试过响车站等咗成粒钟都上唔到车，唔系因为塞车啊，而系因为人太多，车唔够使啫。BRT沿线日日咁多人上落，我惗，就算呢6部巨无霸公交车一齐上路应付高峰期，睇怕都唔多掂咯，就好似条地铁三号线咁，就算车厢增加咗一倍，但车数太少周转唔够快，街坊一样要逼到傻等到烦。

　　好希望多啲呢种巨无霸公交车，最好成条线都用呢种巨无霸，连埋一列无间断运转，咁就唔使我老友日日等车等到咁辛苦啦。嗱，前排广州市领导唔系话，要响广州再建多条BRT咩?既然系咁，建果阵千其要记得，一系最好同依家呢条BRT连埋一齐，二系要提前买定足够嘅巨无霸公交车，一次到位，唔好再搞来搞去拿我哋当实验品啦。

相关链接：
乘坐广州brt的六烦六盼
广州18米BRT正式上路 
广州18米公交车票价
18米BRT“巨无霸”将上路
BRT"巨无霸"公交8月上路
广州BRT巨无霸18米公交车图片  

BRT指南：
广州brt公交线路一览表
广州brt导乘手册

手机访问 广州本地宝首页